ब्युँताउँदै महिला फुटबल- कान्तिपुर समाचार

girls football

लमजुङकी १६ वर्षीया ननिता गुरुङ गाउँमा हुँदा स्ट्राइकर भएर गाविसस्तरीय थुप्रै फुटबल प्रतियोगितामा खेलिन् । धेरै पटक उनको टिमले प्रतियोगितामा कप पनि उचालेको हो ।

दुई महिनायता उनी गाउँ छाडेर अध्ययनका लागि पोखरा आएकी छन् । टप्स उच्चमाविमा कक्षा ११ मा पढ्दै गरेकी उनी सोमबार एकाबिहानै सोमबार पोखरा रंगशालामा भेटिइन् ।

सानैदेखि खेल्दै आएकी उनी यसैमा भविष्य बनाउन विगत तीन महिनादेखि प्रशिक्षणमा व्यस्त छिन् । 'गाउँमा खेल्दा प्रतियोगितामा ३ देखि ५ गोलसम्म हानेकी छु,' फुर्तिलो पारामा उनले भनिन्, 'फुटबलमै केही गरौं भनेर ट्रेनिङ लिन थालेकी हुँ ।'

रंगशालाको मैदानमा उनी जस्तै फुर्तिला किशोरीहरू यतिबेला पोखराको फुटबललाई ब्युँताउन परिश्रमसाथ प्रशिक्षणमा छन् ।

उनीहरूलाई प्रशिक्षणको अवसर पोखरा फुटबल ट्रेनिङ सेन्टरले जुराएको हो । खेलाडी उत्पादनमा कास्की जिल्ला फुटबल संघले पनि सहकार्य गरेको छ । पूर्वराष्ट्रिय तथा अग्रज खेलाडी मिलेर स्थापना गरेको यो संस्थाले उनीहरूलाई नि:शुल्क प्रशिक्षण दिएको छ ।

१८ वर्षीया लक्ष्मी गुरुङ फुटबल नियमित खेल्दै आए पनि चाहिनेजस्तो प्रशिक्षण नपाएर खेल करिअर अगाडि बढाउने कि नबढाउने दोधारमा थिइन् ।

अहिले नि:शुल्क फुटबल प्रशिक्षणको अवसर पाएपछि भने उनी फुटबललाई नै करिअर बनाउने सोचमा पुगेकी छन् । यसअघि डिफेन्सबाट फुटबल खेल्दै आएकी उनले भनिन्, 'ट्रेनिङले खेललाई अघि बढाउन सहयोग गर्ने अपेक्षा लिएकी छु ।' उनले प्रशिक्षणसँगै खेल गतिविधिको अभावले महिला फुटबल अगाडि बढ््न नसकेको गुनासो गरिन् ।

उनी सम्मिलित भएको पोखराको टिमले यसअघि काठमाडौंमा भएको कोकाकोला कपमा तेस्रो स्थान हात पारेको थियो । ह्यान्डबलको राष्ट्रिय तथा अन्तर्राष्ट्रिय खेलमा सहभागी भइसकेकी १९ वर्षीया सुस्मिता गुरुङ पनि फुटबल प्रशिक्षणमा असिनपसिन भएको अवस्थामा भेटिइन् ।

त्यसो त उनी फुटबल र क्रिकेटको पनि राम्रो खेलाडी मानिन्छिन् । स्कुले जीवनमा उनी नै कप्तान बनेर धेरै खेल खेलेको बताइन् । ५ फिट ४ इन्च उचाइकी उनले अब फुटबलमै आफूलाई अभ्यस्त बनाउँदै छिन् । 'अब फुटबलमै करिअर बनाउने भन्ने लागेको छ,' उनले भनिन्, 'राम्रो खेल्न सके महिला फुटबलमा अवसर पाउन सकिन्छ ।'

उनको जस्तै लक्ष्य र सम्भावना खोज्दै २२ जना किशोरी दिनहुँ रंगशालामा बलसँगै दौडधुप गरिरहेका छन् । १६ वर्षदेखि माथि र १९ वर्षभन्दा मुनिका किशोरीहरू प्रशिक्षणमा छन् ।

५० भन्दा बढी किशोरहरूको भिडमा उनीहरू आफूलाई अब्बल देखाउन लागिपरेको देखिन्छन् । एसएलसी दिएका र प्लस टु पढ्दै गरेका किशोरीहरूले हरेक बिहान अढाई घण्टा कठिन अभ्याससहितको प्रशिक्षण लिइरहेका छन् ।

विदेशमा रहेका पूर्वराष्ट्रिय खेलाडीहरूले प्रशिक्षण लिइरहेका उनीहरूलाई बल र जर्सीलगायत सामग्री सहयोग गरिरहेका छन् ।

'महिला फुटबलको अवस्था पछि पर्दै गएकाले सबै खेलप्रेमीमा चिन्ता थपियो,' प्रशिक्षण केन्द्रका प्रमुख तथा फुटबल प्रशिक्षक शम्भु केसीले भने, 'महिलाहरूको फुटबललाई ब्युँताउन जरुरी देखेर नि:शुल्क रूपमा प्रशिक्षण दिन थालिएको हो ।'

फुटबलमा नयाँ पुस्ता हराउँदै गएकाले पनि चार वर्षदेखि नयाँ पुस्ताका खेलाडीलाई प्रशिक्षण दिँदै आएको उनले बताए । किशोरीहरूलाई भने यसै वर्षदेखि प्रशिक्षण दिन थालिएको उनले बताए ।

उनले भने, 'केटाहरूलाई तालिम दिन थालेको चार वर्ष भयो ।' खेलकुद विकास समितिमा २० वर्ष फुटबल प्रशिक्षकका रूपमा रहेर भर्खरै अवकाश लिएका केसीले नेपालका चर्चित फुटबलर अनिल गुरुङ, विजय गुरुङ, शिव श्रेष्ठ, वसन्त, विशन गौचन र सुविन्द्र श्रेष्ठलगायतलाई पनि पोखरामा प्रशिक्षण दिएका थिए । उनले भने, 'पोखरामा २०४२ सालसम्म महिला फुटबलको राम्रो सम्भावना थियो ।'

२०४० सालमा भएको दोस्रो राष्ट्रिय खेलकुदअन्तर्गत महिला फुटबलमा पोखराको टिम दोस्रो भएको थियो । त्यस्तै २०४२ सालमा हङकङमा आमन्त्रण फुटबल खेल्न गएको नेपाली महिला राष्ट्रिय टिममा समेत पोखराका ६ खेलाडी सहभागी भएको केसी सम्झन्छन् ।

त्यसपछि भने महिला फुटबल गतिविधि र खेलाडी उत्पादन ठप्पै भयो । अहिले वर्षौंपछि खेल ब्युँताउन खेलाडीहरू लागिपरेका छन् ।

महिला फुटबल खेलको विकास गर्न आगामी असोज ३ देखि एक साता पोखरामै नेपाल कप महिला आमन्त्रण फुटबल प्रतियोगितासमेत आयोजना हुँदै छ । प्रतियोगितामा कास्की महिला टिमले सहभागिता जनाउने भएको छ ।

Content/Photo: Kantipur

जित्ने दाबी झुठो हुन्छ– ओजेम्स: नागरिकन्युज

nepal training

काठमाडौं – 'कुनै प्रशिक्षकले उपाधि जित्ने दाबी गर्छ भने त्यो सरासर ढाटेको बुझे हुन्छ। मैले पनि त्यस्तो दाबी गरे झुटा बोलिरहेको ठान्नु,' मंगलबार औपचारिक रुपमा राष्ट्रिय फुटबल टोलीको प्रशिक्षण सम्हालेपछि प्याटि्रक ओजेम्सले भने।

 

साफ च्याम्पियनसिपका पछिल्ला दुई संस्करणमा नेपाल सेमिफाइनल पुगेको पृष्ठभूमिमा यो पटक च्याम्प्यियन बन्ने आशा गर्न सकिन्छ भन्ने प्रश्नमा बेल्जियन प्रशिक्षकको जवाफ थियो, 'जितका लागि कसम खाँदिन तर कडा मिहिनेत र राम्रो प्रदर्शनको ग्यारेन्टी भने दिन सक्छु। टोलीलाई जितका लागि तयार पार्नुपर्छ। प्रदर्शनमा सुधार गर्न सके सफलताको सम्भावना पनि बढ्दै जान्छ।'

सन् २०११ मा ग्राहम रोबर्टस् र दुई वर्ष अघि ज्याक स्टेफानोस्कीको प्रशिक्षणमा नेपाल साफ च्याम्पियनसिपको अन्तिम चारमा पुगेको थियो। आठौं संस्करणको समाप्तीसम्म नेपाल फाइनल पुग्न सकेको छैन।

अघिल्लो साता औपचारिक जिम्मेवारी नभए पनि नेपाल र भारतको मैत्रीपूर्ण खेल हेर्न ओजेम्स पुणे पुगेका थिए। उनले मंगलबारदेखि तीन दिन राष्ट्रिय टोलीसहित ३० खेलाडीलाई प्रशिक्षणमा डाकेका छन्। एन्फा कम्प्लेक्सको कृत्तिम मैदानमा उनको प्रशिक्षण झन्डै तीन घन्टा चल्यो। बोलाइएका सवै ३० खेलाडी पहिलो दिन प्रशिक्षणमा सहभागी भए।

पहिलो दिनको प्रशिक्षण पछि खेलाडीका बारेमा उनले भने, 'यहाँका खेलाडी प्रतिभावान छन्। युवामा क्षमता भए पनि अनुभवको कमी देखिन्छ। टोलीमा धेरै परिवर्तन गर्न बाँकी छ। अभ्यास गर्न बाँकी छ। त्यसमा एकाग्रता जरुरी छ। समय पनि लाग्छ।'

डिसेम्बरमा भारतमा हुने साफ च्याम्पियनसिप मुख्य लक्ष्य रहेको जनाउँदै त्यही उदेश्यमा केन्द्रित भएर तयारी अघि बढाउने उनले बताए। 'हामीसँग तीन महिनाको योजना छ। तर त्यसका लागि खेलाडीको प्रदर्शन पनि हेर्न चाहन्छु,' भदौ १० मा पहिलो पटक नेपाल आएका उनले उत्साहित हुँदै भने, 'संयोग भनौं यही साताबाट लिग सुरु हुँदैछ। त्यो हाम्रो लागि खेलाडी खोजीको एउटा मौका हो। मलाई आशा छ, ६/७ खेलाडी त्यहाँबाट छान्न सकिन्छ।'

उनले अवको तीन महिनामा टोलीमा परिवर्तन आउने दाबी गरे। ओजेम्सले योजना सुनाए, 'केही दिनपछि सुरु हुने लिगबाट नयाँ खेलाडी छान्न सकियो भने मैले सोचेजस्तो टोली तयार हुनेछ। त्यसपछि हामी योजना मुताविक अघि बढ्न सक्छौं।'

टोलीमा युवा खेलाडीको बाहुल्य रहेकोमा खुसी व्यक्त गरे पनि फुटबलमा अनुभवको पनि महत्व हुने बताए। 'सम्भवतः नेपाली टोली संसारकै युवा टोलीमा पर्छ। औसतमा खेलाडीको उमेर २५ वर्ष छ,' उनले भने, 'अहिले टोलीमा अनुभवी र कम अनुभव भएका युवा खेलाडी छन्। पहिले खेलाडीको फिटनेसमा बढी ध्यान दिनेछौं। पछि प्राविधिक विषयमा जोड दिँदै युवा र अनुभवी खेलाडीको समिश्रणमा टोलीलाई तयार पार्नेछौं।'

पछिल्लो ८ अन्तर्राष्ट्रिय खेलमा नेपाली खेलाडीले गोल हान्न नसकेको बुझेका उनले आशावादी हुँदै भने, 'नेपालले गोल गर्न सक्छ। त्यसका लागि हामी अभ्यासमा कडा मिहिनेत गर्नेछौंं। म आक्रामक फुटबल खेलाउने प्रशिक्षक हुँ। छिट्टै गोल निस्कनेमा मलाई विश्वास छ। राम्रो मुभ बनाएर कसरी गोल हान्ने त्यो सिकाउने जिम्मा मेरो हो।'

नेपाल आउनुअघि यहाँको फुटबलवारे अनविज्ञ रहेको उल्लेख गर्दै १९९२ देखि प्रशिक्षणमा संलग्न रहँदै आएका ओजेम्सले भने, 'मैले चीनमा पनि केही समय काम गरेँ। तर पनि मलाई नेपाली फुटबलबारे कुनै जानकारी थिएन। अखिल नेपाल फुटबल संघ (एन्फा) सँग सम्झौता भएपछि मात्र मैले यहाँको फुटबलबारे अध्ययन थालेको हुँ।'

 

आक्रमणमा कमजोर

ओजेम्सले पुणेमा भारतसँगको मैत्रीपूर्ण खेलमा नेपालको रक्षापंक्तिले उच्च प्रदर्शन गरेको बताए। 'एउटा खेलाडीले अर्कोलाई निकै साथ दिएर खेले। उनीहरुमा दृढता र जुझारुपन देखिन्थ्यो,' मासिक ७ हजार डलरमा एन्फासँग सम्झौता गरेका उनले खेलको स्मरण गर्दै भने, 'आक्रमणमा कमजोर देखियो। नेपाली खेलाडी शारिरिक रुपमा जब्बर छैनन्। प्राविधिक रुपमा भने उत्कृष्ट छन्। तर भारतसँग अनावस्यक लामो पास खेले। त्यसैले छोटो पासमा केन्द्रित हुनु पर्ने देख्छु। प्राविधिक रुपमा खेले विपक्षीलाई दुःख दिने सम्भावना रहन्छ।'

भारतको प्रदर्शनमा भने उनले खिन्नता व्यक्त गरे। 'भारत त्यति ठूलो देश भएर पनि नेपाललाई हराउन सकेन। उनीहरुसँग राम्रा खेलाडी नभएका होइनन्। तर पनि धेरै ठाँउमा सुधार गर्नुपर्ने देख्छु,' उनले भने, 'उनीहरुभन्दा प्राविधिक रुपमा नेपाल धेरै माथि छ। भारतको फुटबल मलाई चित्त बुझ्दो लागेन।' दक्षिण एसियाका अन्य राष्ट्रको प्रदर्शन पनि छिट्टै हेर्ने उनले योजना सुनाए। 'विश्वकप छनोटमा भूटान र माल्दिभ्सले चीनसँग खेल्दैछन्। चीनमा मेरा साथीहरु छन्। मैले त्यो भिडियो मगाएको छु।'

नेपाल यू– १९ उत्कृष्ट

प्रशिक्षक ओजेम्सले दस दिनअघि साफ यु–१९ च्याम्प्यिनसिप जितेको नेपाली टोलीको पनि प्रशंसा गरे। 'युवा टोली राम्रो छ। त्यसमा निकै प्रभावशाली खेलाडी छन्। राष्ट्रिय टोलीमा नरहेका खेलाडीले पनि साफ च्याम्पियनसिपमा उत्कृष्ट प्रदर्शन गरे,' नेपाल र भारतको युवा टोलीको फाइनल हरेका उनले भने, 'राष्ट्रिय टोली नै युवा छ। तर हामीले निरन्तर यु–१९का खेलाडीलाई पनि हेर्नुपर्छ। यसलाई निरन्तरता दिन सक्यौं भने नेपाललाई भविष्यमा फाइदा पुग्न सक्छ।'

Content/Photo: Nagarik News

च्‍यासल मैदानमा 'एस्ट्रो ट्रफ' रंगशाला - अन्नपूर्ण पोस्ट

chyasal football ground

अखिल नेपाल फुटबल संघ (एन्फा) ले ललितपुरको च्यासलमा एस्ट्रो ट्रफ र फ्लड लाइट (कृत्रिम घाँस र प्रकाशसहितको) रंगशाला बनाउने भएको छ।

एन्फाले विश्व फुटबल महासंघ (फिफा) ले नेपाललाई उपलब्ध गराएको विशेष प्रोजेक्टबाट एस्ट्रो ट्रफ र फ्लड लाइट जडित रंगशाला बनाउने तयारी गरेको जानकारी एन्फाका अध्यक्ष गणेश थापाले दिए।

'फिफाले नेपाललाई मैदान निर्माणका लागि १० करोड रुपैयाँ विशेष सहयोग गरेकोले उक्त रकम च्यासलमा रंगशाला बनाउन खर्च गर्न लागिएको हो', थापाले भने। सरकारले हालै सार्वजनिक गरेको आर्थिक वर्ष २०७२-७३ को बजेटमा समेत च्यासल फुटबल मैदानलाई वैकल्पिक रंगशाला बनाउन बजेट विनियोजन गरेको छ।

सरकारबाट प्राप्त रकमलाई १० देखि १२ हजार दर्शक क्षमताको प्यारापिट निर्माणमा उपयोग गरिने जानकारी थापाले दिए। 'फिफाको सहयोगले मैदानमा एस्ट्रो ट्रफ र फ्लड लाइट राखिनेछ। फुटबल रंगशालासहित च्यासलमा छुट्टै फुटसल कोर्टसमेत निमार्ण गरिनेछ', अध्यक्ष थापाले अन्नपूर्णसँग भने।

यसअघि फिफाले नेपाललाई गोल प्रोजेक्टअन्तर्गत भौतिक संरचना निर्माणका लागि आर्थिक सहयोग गर्दै आएको थियो। अहिले रंगशाला निर्माणका लागि फिफाले छुट्टै १० करोड रुपैयाँ सहयोग गरेको हो।

थापाका अनुसार च्यासल मैदानमा रंगशाला निर्माणका लागि केही दिनभित्रै माटोको परीक्षण गरिने भएको छ। माटोको परीक्षणपछि दसैं अगाडि नै रंगशाला निर्माणका लागि टेन्डर आह्वान गरिने पनि थापाले बताए। रंगशालाको निर्माण कार्य भने दसैंपछि सुरु गरिनेछ।

वैकल्पिक रंगशाला निर्माणका लागि दुईतीन वर्ष लाग्ने भएकाले निर्माण पूरा हुन्जेलसम्म ४० करोड रुपैयाँभन्दा बढी खर्च हुने बताइएको छ। सरकारको बजेट र फिफाको समेत सहयोग रहेकाले रंगशाला बन्ने निश्चित भएको थापाले बताए।

रंगशालाको निर्माणपछि घरेलु लिगलगायतका मझौला स्तरका अन्तर्राष्ट्रिय प्रतियोगितासमेत सञ्चालन गर्न सकिनेछ।एउटामात्र दशरथ रंगशालाको भारलाई समेत च्यासलमा बन्ने रंगशालाले कम गर्नेछ।

'नयाँ रंगशाला बनेपछि हिलो र धूलोमा खेल्नुपर्ने बाध्यता कम हुनेछ भने ध्वस्त बन्दै गएको दशरथ रंगशालाले पनि केही आराम पाउनेछ', थापाले भने, 'च्यासल मैदान एन्फाकै स्वामित्वमा रहेकाले विभिन्न प्रतियोगिताका लागि रंगशाला उपलब्ध गराउन धेरैसँग अनुनय विनय गर्नुपर्ने अवस्थाको समेत अन्त्य हुनेछ।'

एन्फाले च्यासल मैदान रहेको जग्गा ललितपुर उपमहानगरपालिकासँग लिजमा लिएर लामो समयदेखि फुटबल गतिविधि सञ्चालन गर्दै आएको छ। यसअघि च्यासल मैदानमा 'बी' र 'सी' डिभिजन लिग, विभिन्न साना प्रतियोगिता, अन्तर्राष्ट्रिय स्तरको प्रतियोगितामा सहभागी टोलीको प्रशिक्षणलगायतका गतिविधि गरिँदै आएको थियो।

यसैगरी एन्फाले सातदोबाटोस्थित कृत्रिम मैदानमा पनि फ्लड लाइट राख्ने भएको छ। फ्लड लाइट जडानका लागि डेढ करोड रुपैयाँ लगानी गर्न लागिएको जानकारी थापाले दिए। एन्फा मैदानमा अहिले तीन हजार दर्शक क्षमताको प्यारापिट निर्माणकार्य भइरहेको छ।

एन्फा परिसरमा दुई वर्षअघि निर्माण गरिएको कृत्रिम मैदानमा अहिले जुनियर फुटबल टोलीको अभ्यास भइरहेको छ। एन्फाले यसै वर्ष बुटवल टेक्निकल सेन्टरमा पनि सरकार र विभिन्न निकायको सहयोगमा सुविधासम्पन्न रंगशाला निर्माण गर्ने भएको छ।

भ्रष्टाचारको छानबिनका कारण गणेश थापा एएफसी निर्वाचनमा सहभागी हुन नपाउने: Pahilopost

afchouse 2013b

एसियाली राष्ट्रहरुको फुटबलको सर्वेसर्वा एसियाली फुटबल महासंघ (एएफसी) को निर्वाचनमा गणेश थापा सहभागी हुन नपाउने भएका छन्। भ्रष्टाचारको विषयमा छानबिन हुँदै गरेकोले निलम्बित हुनुअघि उनी एएफसीका उपाध्यक्ष थिए।

सन् २०१५ को निर्वाचनका लागि एएफसीले सार्वजनिक गरेको तालिका अनुसार अप्रिल ३०, २०१५ मा मतदान हुने तय भएको छ। तर, एएफसीको विधान अनुसार त्योभन्दा ६० दिनअघि नै सदस्य संघहरुले उम्मेदवारी दर्ता गर्नुपर्ने हुन्छ।

विश्व फुटबल महासंघ (फिफा) को अनुशासन कमिटीले भ्रष्टाचारको विषयमा छानबिन जारी राख्दासम्म गत नोभेम्बर ४ देखि लागू हुने गरी चार महिना (१२० दिन) का लागि थापालाई निलम्बन गरेको थियो। उम्मेदवारी दर्ताको समय निलम्बन अवधिभित्रै परेका कारण उनी यस पटक निर्वाचन प्रक्रियामा सहभागी हुन नसक्ने भएका हुन्।

२० वर्षसम्म नेपाली फुटबलको नेतृत्वमा रहेका थापासहित अखिल नेपाल फुटबल संघ (एन्फा)का चार पदाधिकारीलाई संसद्को सार्वजनिक लेखा समितिले ५८ करौड रुपैयाँभन्दा बढी भ्रष्टाचार भएको भन्दै पद स्थगन गरी अनुसन्धान अगाडि बढाउन खेलकुद मन्त्रालय, अख्तियार अनुसन्धान आयोग र सम्पत्ति शुद्धिकरण अनुसन्धान विभागलाई निर्देशन दिएको थियो।

सुरुमा पद छाड्न आनाकानी गरिरहेका थापाले फिफाबाटसमेत यल्लो कार्ड पाएपछि गत कात्तिकमा दुई महिनाका लागि पद छाडेर आफू निकटकै वरिष्ठ उपाध्यक्ष तथा प्रवक्ता ललितकृष्ण श्रेष्ठलाई कार्यवाहक अध्यक्षको जिम्मेवारी दिएका थिए। सो दुई महिनाको अवधि पुस ३ मा सकिसकेको छ।

तर त्यसको दुई साता नबित्दै फिफाको अनुशासन कमिटीलाई थापाले चार महिनासम्म राष्ट्रिय तथा अन्तर्राष्ट्रिय रुपमा प्रशासनिक, खेल वा अन्य कुनै पनि रुपमा फुटबलसँग सम्बन्धित गतिविधिमा सहभागी नहुने बताएका थिए। यो अवधि फागुन १९ (मार्च ३, २०१५) सम्म रहनेछ।

योसँगै एएफसीको वेबसाइटबाट उपाध्यक्षहरुको सूचीमा चीन, मलेसिया, युएईसँगै रहेको नेपालको नाम हटाई अस्ट्रेलियाको नाम थपिएको छ।

मलेसियाको क्वालालम्पुरमा मुख्य कार्यालय भएको एएफसीमा ४६ सदस्य र एक एसोसिएट सदस्य छन्। एसियामा फुटबलको नियमन गर्ने, नयाँ नियम बनाउने, महत्त्वपूर्ण प्रतियोगिता आयोजना गर्ने, फुटबलको विकासका लागि आवश्यक कार्यक्रम ल्याउने जस्ता काम यसैमार्फत् हुने गर्छ। छ सदस्य महासंघ मिलेर बनेको विश्व फुटबल महासंघ (फिफा) को एक महासंघ एएफसी हो।

आहा कपमा अल्टरसट टाउन एफसी आउने: Nagarik News

aldershot town fc 2

पोखरामा माघ अन्तिम साता हुने आहा–रारा गोल्डकप फुटबलमा भाग लिन बेलायती टोली अल्टरसट टाउन एफसी आउने भएको छ।

बेलायतमा बसोबास गर्ने नेपालीले गठन गरेको सहारा एफसी युकेसँग सहकार्यमा इङ्लिस लिग फुटबल पिरामिडअन्तर्गत पाँचौं श्रेणीको क्लबको दोस्रो रोजाइ टोली नेपाल आउने भएको हो। टोलीमा अल्डरसटको पहिलो रोजाइका पाँच खेलाडी रहने सहारा युकेका अध्यक्ष नवीन गुरुङले जानकारी गराएका छन्। उनका अनुसार अल्डरसटले नेपाल आउन २० सदस्यीय टोली तयार गरेको छ। अल्डरसट टोलीमा नेपाली राष्ट्रिय टोलीका पूर्वफिजियो नवल गुरुङ सल्लाहकार तथा फिजियोको भूमिकामा हुनेछन्।
टोली फेब्रुअरी ६ मा काठमाडौं आइपुग्ने बताइएको छ।

'अल्डरसटका खेलाडी र पदाधिकारीहरू नेपाल भ्रमणका लागि निकै उत्साही छन्। नेपाल गएर आहा–रारा गोल्डकपमा भाग लिनुका साथै फुटबलको माध्यमबाट केही उपकारी काम पनि गर्ने उनीहरूको योजना छ,' गुरुङले अल्डरसटका फिजियो नवल गुरुङलाई उद्धृत गर्दै लेखेका छन्, 'अल्डरसटको टोली १३औं आहा रारा गोल्डकपको उपाधि उचाल्न सक्षम छ।'

अहिले कन्फरेन्स प्रिमियर लिग खेलिरहेको अल्डरसटले चार तह बढुवा भएपछि मात्र प्रिमियर लिगको हैसियत पाउनेछ। अल्डरसटले खेल्न पाउने सबैभन्दा ठूलो प्रतियोगिता एफए कप हो। क्लबको लन्डनको अल्डरसट सिटीमा ७ हजार ५ सय दर्शक क्षमताको आफ्नै रंगशाला छ।

नेपालको फुटबल विकासमा सहयोग गर्ने दीर्घकालीन लक्ष्यसहित सहारा युके र अल्डरसटबीच सहमति भएको थियो। सहमतिअनुसार अल्डरसटले सञ्चालन गरिरहेको यु–८ र यु– ११ को एकेडेमीमा बेलायतमै बसोबास गर्ने नेपाली बालकलाई प्रशिक्षण गराउने, नेपालका प्रतिभावान खेलाडीलाई क्लबमा व्यावसायिक अनुबन्धन दिने, नेपाली टिमलाई भ्रमण गराउने थियो।